Nazirlər Kabinetinin 387 №-li Qərarına dair izah
Rəqəmsal iqtisadiyyatın tərkib hissəsi olan elektron ticarətin şəffaf və qanunamüvafiq şəkildə vergiyə cəlb edilməsi, ölkələrin bərabər şərtlərlə vergitutma hüququnun tanınması, verginin əsas iqtisadi fəaliyyətin həyata keçirildiyi və dəyərin yarandığı ölkədə tutulması, mənfəətin yurisdiksiyalar arasında ədalətli şəkildə bölüşdürülməsi və nəticə etibarilə ədalətli və davamlı iqtisadi rəqabətin təmin edilməsi məqsədilə Azərbaycan Respublikasının Vergi Məcəlləsinə dəyişikliklər edilmişdir.
Eyni zamanda həmin Məcəllənin 169.8-ci maddəsinə əsasən Məcəllənin 33.8-1-ci maddəsində nəzərdə tutulan qaydada uçota alınan qeyri-rezident tərəfindən bu fəslin məqsədləri üçün işlərin və xidmətlərin göstərilməsi bu maddəyə uyğun olaraq vergiyə cəlb edilmir və bu əməliyyatlar üzrə yaranan vergi öhdəliyi qeyri-rezident şəxs tərəfindən bu Məcəlləyə uyğun olaraq hesablanıb ödənilir.
Elektron ticarət xidməti göstərən transmilli şirkətlərə daha asan və məsafədən qeydiyyat imkanın yaradılması, fəaliyyət göstərdikləri və iqtisadi dəyər yaratdıqları ölkələrdə birbaşa xarici investisiyaların yatırımına marağı artırır, bu isə öz növbəsində yerli istehsalı, yeni iş yerlərinin açılmasını və iqtisadiyyatın aidiyyəti digər sektorlarının (informasiya texnologiyaları üzrə sektorlar və onlara yardımçı sektorlar) stimullaşdırılmasını dəstəkləməklə yanaşı, yüksək informasiya texnologiyalarının və bu sahədə ən yaxşı təcrübələrin həmin ölkələrə transfer edilməsi ilə nəticələnir.
Qərarın qəbul edilməsi vətəndaşların maliyyə vəsaitlərinin qənaət edilməsinə xidmət edəcəkdir.
Belə ki, qəbul edilmiş Qərara əsasən uçota alınan qeyri-rezident şəxs tərəfindən Vergi Məcəlləsinin XI fəslinin məqsədləri üçün işlərin və xidmətlərin göstərilməsi Vergi Məcəlləsinin 169-cu maddəsinə əsasən agent tərəfindən (yerləşən banklar və bank əməliyyatlarının ayrı-ayrı növlərini həyata keçirən kredit təşkilatları) ödəmə mənbəyində vergiyə cəlb edilməməsi səbəbindən, bu əməliyyatlar üzrə yaranan vergi öhdəliyi qeyri-rezident şəxs tərəfindən Vergi Məcəlləsinə uyğun olaraq ümumi qaydada hesablanıb ödənilir.
Beləliklə, qeyri-rezidentin vergi öhdəliyi vergi orqanında uçotda olmayan şəxslərdən tutulan vəsait hesabına deyil, birbaşa qeyri-rezidentin özü tərəfindən icra ediləcəkdir.
