Nazirlər Kabinetinin 128 №-li Qərarına dair izah
Qərar Azərbaycan Respublikası Prezidentinin 2025-ci il 14 iyul tarixli 442 nömrəli Fərmanının 2.1.1-ci yarımbəndinin icrasını təmin etmək məqsədilə qəbul edilmişdir.
Qaydalar istilik enerjisindən istifadə sahəsində istilik təchizatı subyektləri ilə istilik enerjisinin istehlakçısı arasında yaranan qarşılıqlı münasibətləri və bununla əlaqədar digər məsələləri, o cümlədən tikinti obyektlərinin şəbəkəyə qoşulması və ya əlavə enerji (güc) alması üçün texniki şərtlərin, layihə sənədlərinin hazırlanması və verilməsini, habelə onların şəbəkəyə qoşulmasını tənzimləyir.
Qaydalara əsasən sifarişçilərin tikinti obyektlərinin şəbəkəyə qoşulması və ya əlavə enerji (güc) alması məqsədilə texniki şərtlərin hazırlanması və verilməsi üçün haqq ödənilmir. Tikinti obyektinin şəbəkəyə qoşulması ilə əlaqədar layihənin hazırlanması və tikinti obyektindən və ya tikinti obyektinin yerləşəcəyi torpaq sahəsindən şəbəkənin qoşulma nöqtəsinədək istilik xətlərinin çəkilməsi və tikinti-quraşdırma işləri isə sifarişçinin öz vəsaiti hesabına, onun seçiminə uyğun olaraq paylayıcı və ya podratçı tərəfindən həyata keçirilir.
Qaydalar, həmçinin istilik və isti su sayğaclarının quraşdırılması və istismarı, istilik və isti su təchizatına görə hesablaşmalarla bağlı məsələləri də tənzimləyir. İstehlakçıların sayğacla təchiz edilməsi, onun quraşdırılması və dəyişdirilməsi məişət istehlakçılarına münasibətdə paylayıcının vəsaiti hesabına həmin paylayıcı tərəfindən, qeyri-məişət istehlakçılarına münasibətdə isə istehlakçının öz vəsaiti hesabına paylayıcı, yaxud istehlakçının seçdiyi podratçı tərəfindən həyata keçirilir. Təbii inhisar subyekti qismində çıxış edən paylayıcı tərəfindən göstərilən istilik təchizatına görə hesablaşmalar məişət istehlakçıları üzrə Azərbaycan Respublikasının Tarif (qiymət) Şurası tərəfindən müəyyən edilmiş tariflərlə, isti su təchizatına və qeyri-məişət istehlakçıları üzrə, habelə digər paylayıcılar tərəfindən göstərilən istilik və isti su təchizatına görə hesablaşmalar isə müqavilə ilə müəyyən edilmiş tariflərlə həyata keçirilir.
