“Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın təsdiq edilməsi haqqında” Azərbaycan Respublikası Prezidentinin 2023-cü il 5 iyun tarixli 3910 nömrəli Sərəncamının icrasını təmin etmək məqsədilə:
1. Azərbaycan Respublikasının İqtisadiyyat Nazirliyi Azərbaycan Respublikasının Maliyyə Nazirliyi, Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi, İqtisadi İslahatların Təhlili və Kommunikasiya Mərkəzi və “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nda (bundan sonra – Proqram) nəzərdə tutulmuş tədbirlər üzrə icraçı orqanlar (qurumlar) ilə razılaşdırmaqla, Proqramın Tədbirlər Planına və müəyyənləşdiriləcək maliyyə vəsaitinin həcminə uyğun olaraq, iki ay müddətində 2023–2024-cü illər üzrə, 2024-cü il iyulun 1-dək isə 2025–2027-ci illər üzrə Tədbirlər Planında nəzərdə tutulmuş məsələlərin icrasının təmini üçün daha təfsilatlı tədbirlər planlarının layihələrini Azərbaycan Respublikasının Nazirlər Kabinetinə təqdim etsin.
2. İqtisadi İslahatların Təhlili və Kommunikasiya Mərkəzi:
2.1.    Proqramda nəzərdə tutulmuş tədbirlərin icrasının monitorinqini və qiymətləndirilməsini təmin etmək məqsədilə mövcud rəqəmsal resurslar əsasında “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramının icrasının monitorinqi və hesabatlılıq modulu”nun (bundan sonra – Modul) formalaşdırılmasını 3 (üç) ay müddətində təmin etsin;
2.2.    Proqramda qeyd olunmuş tədbirlərlə bağlı icraçı orqanlar (qurumlar), obyektlər üzrə icra müddətlərini (illər üzrə bölgüsü), layihələrlə bağlı (texniki-iqtisadi, ekspertiza və s.) məlumatları və digər zəruri göstəriciləri təsnifatlandırmaqla, mövcud vəziyyət barədə informasiyaları, aidiyyəti foto və videomaterialları, habelə iri layihələrə münasibətdə birbaşa (onlayn) kamera müşahidəsini təmin edən sistemdə hesabatlılığa imkan verən müvafiq bölmələrin Modulda yaradılmasını təmin etsin;
2.3.    Proqramda nəzərdə tutulmuş tədbirlərin icrasının monitorinqinin nəticəsi barədə məlumatları ildə bir dəfə, hər ilin mart ayının 25-dək Azərbaycan Respublikasının Nazirlər Kabinetinə təqdim etsin;
2.4. Proqramda nəzərdə tutulmuş tədbirlərin icrasının qiymətləndirilməsinin nəticəsi barədə məlumatları 2025-ci və 2028-ci illərin mart ayının 25-dək Azərbaycan Respublikasının Nazirlər Kabinetinə təqdim etsin.
3. Proqramda nəzərdə tutulmuş tədbirlər üzrə əsas və digər icraçı orqanlar (qurumlar) Proqramda qeyd olunmuş tədbirlərin aidiyyəti üzrə icrası məqsədilə rəhbərlərinin müavinlərindən ibarət məsul şəxsləri təyin edərək onlar barədə məlumatı 10 (on) gün müddətində Azərbaycan Respublikasının Nazirlər Kabinetinə təqdim etsinlər.
4. Proqramda nəzərdə tutulmuş tədbirlər üzrə əsas icraçı orqanlar (qurumlar) bu Sərəncamın 2.2-ci bəndində göstərilən məlumatların monitorinq və qiymətləndirmənin həyata keçirilməsi məqsədilə İqtisadi İslahatların Təhlili və Kommunikasiya Mərkəzinə təqdim edilməsi üçün rübdə bir dəfə, növbəti ayın 15-dək, ilin yekunları barədə məlumatların isə hər ilin yanvar ayının 25-dək Modulda yerləşdirilməsini təmin etsinlər.
5. Bu Sərəncamın icrasına nəzarət Azərbaycan Respublikası Nazirlər Kabineti Aparatının rəhbərinə və Regionların inkişafı şöbəsinə həvalə edilsin.
6. Bu Sərəncam imzalandığı gündən qüvvəyə minir.

Əli Əsədov

Azərbaycan Respublikasının Baş naziri

Bakı şəhəri, 14 iyun 2023-cü il