Nazirlər Kabinetinin 346 №-li Qərarına dair izah

Azərbaycan Respublikası Nazirlər Kabinetinin 2026-cı il 21 oktyabr tarixli 346 nömrəli Qərarı ilə “Azərbaycanın Uzunmüddətli Aşağı Karbonlu İnkişaf Strategiyası” təsdiq edilib. Strategiya ölkəmizin iqlim dəyişmələri ilə mübarizə sahəsində uzunmüddətli hədəflərini müəyyən edir və 2060-cı ilədək xalis sıfır emissiya səviyyəsinə nail olunmasına yönəlmiş tədbirləri əhatə edir. 

Qərar iqtisadiyyatın əsas sektorları üzrə istixana qazları emissiyalarının azaldılmasını, bərpaolunan enerji mənbələrindən və enerji səmərəli texnologiyalardan istifadənin genişləndirilməsini, habelə dekarbonlaşma prosesində sosial-iqtisadi amillərin və ədalətli keçid prinsiplərinin nəzərə alınmasını nəzərdə tutur.

Strategiyada neft-qaz sektoru, elektrik enerjisi istehsalı, binalar, nəqliyyat, kənd təsərrüfatı, meşəçilik və torpaqdan istifadə, eləcə də tullantılar üzrə emissiyaların azaldılması istiqamətləri müəyyənləşdirilir. Qərar, həmçinin, ölkənin dayanıqlı inkişaf məqsədləri və beynəlxalq iqlim öhdəlikləri ilə uzlaşmanı təmin etməyə xidmət edir. 

Strategiyanın həyata keçirilməsi maliyyə resurslarının cəlb edilməsini, müvafiq texnologiyalara çıxışın təmin olunmasını, institusional və kadr potensialının gücləndirilməsini, eləcə də dövlət-özəl tərəfdaşlığının inkişafını tələb edir. 

Strategiyanın təsdiq edilməsi Azərbaycanın iqlim dəyişmələri ilə mübarizə sahəsində uzunmüddətli siyasətinin müəyyənləşdirilməsinə və aşağı karbonlu iqtisadiyyata keçidin təşviqinə xidmət edir.