Nazirlər Kabinetinin 382 №-li Qərarına dair izah
Azərbaycan Respublikası Nazirlər Kabinetinin 2026-cı il 13 noyabr tarixli 382 nömrəli Qərarı ilə “İnternet telekommunikasiya xidməti göstərən operatorların və provayderlərin uçotunun aparılması Qaydası”nda dəyişiklik edilib.
Dəyişikliklərə əsasən, operator və provayderlərin uçota alınması üçün təqdim etməli olduqları sənədlərin və məlumatların əhatə dairəsi genişləndirilib. Belə ki, telekommunikasiya şəbəkəsinin texniki göstəriciləri, istifadə olunan avadanlıqlar, şəbəkənin strukturu və xəritəsi, xidmətin keyfiyyətinə nəzarət sistemi, abunəçilərə dair fərdi məlumatların informasiya sistemlərinin dövlət qeydiyyatı, habelə ümumistifadəli telekommunikasiya şəbəkəsinə qoşulma barədə məlumatların təqdim edilməsi müəyyən olunub.
Eyni zamanda, operator və provayderlərin hüquqi və fəaliyyət ünvanları, xidmət göstərdikləri istifadəçilərin növü, xidmətin satış forması, əlaqələndirici şəxsin məlumatları və tətbiq etdikləri müqavilə nümunəsi üzrə məlumatların uçotda əks etdirilməsi nəzərdə tutulub.
Bundan əlavə, uçota alınma üçün müraciət edən fiziki və hüquqi şəxslərin ərizələrində FİN kodunun göstərilməsi, eləcə də elektron poçt ünvanına göndərilən məktubların daxil olduğu gündən 3 iş günü keçdikdən sonra rəsmi qaydada verilmiş hesab olunması ilə bağlı müddəalar müəyyən edilib.
Qərarın müvafiq texniki sənədlərin təqdim edilməsinə dair yeni tələbləri onun qüvvəyə minməsindən sonra uçota alınmaq üçün müraciət edən operator və provayderlərə şamil olunur.