Nazirlər Kabinetinin 344 №-li Qərarına dair İZAH

 Yeni sertifikasiya Qaydalarına əsasən yalnız sertifikasiya imtahanından keçən şəxslər deyil, həmçinin hər il orta hesabla 50 kredit olmaqla 5 il ərzində DPİ üzrə minimum 250 krediti toplamış tibb mütəxəssislərinə də şəhadətnamə veriləcəkdir. Sözügedən krediti toplamayan və  ən azı 5 il müddətində fasiləsiz olaraq ixtisasları üzrə işləməyən şəxslər sertifikasiya imtahanında iştirak etməlidirlər.

Sertifikasiya imtahanının qaydalarında da bir sıra dəyişikliklər nəzərdə tutulub. Belə ki, imtahan prosesi zamanı namizədlərə qadağan edilən hərəkətlər, imtahanın keçirilməsinin təxirə salınması qaydası və müddəti, imtahan nəticəsindən narazı qalan namizədin apellyasiya şikayəti verməsi prosesi qaydada öz əksini tapmışdır.

Həmçinin Qaydanın müddəalarına əsasən tibb mütəxəssislərinin davamlı peşəkar inkişafı onların elmi və (və ya) tədris tədbirlərində iş yeri və orta əməkhaqqı saxlanılmaqla iştirakı, elmi, pedaqoji və (və ya) müstəqil davamlı peşəkar inkişaf fəaliyyəti vasitəsilə kredit vahidlərinin toplanılması yolu ilə həyata keçirilir.

Eyni zamanda, köhnə sertifikasiya qaydasından fərqlənən əsas yeniliklərdən biri də şəhadətnamənin ləğvinin Qaydada nəzərdə tutulmasıdır.

Qaydaların digər bir yeni müddəasına əsasən tibb mütəxəssisi tibb və ya səhiyyə ixtisasları üzrə iki fərqli ixtisas üzrə sertifikasiya şəhadətnaməsi əldə edə və həmin ixtisaslar üzrə praktik fəaliyyətlə məşğul ola biləcəklər.

Tibb mütəxəssislərinin sertifikasiyası Səhiyyə Nazirliyin Elmi-Tibbi Şurası və Tibb Müəssisələrinin Akkreditasiyası və Keyfiyyətə Nəzarət Mərkəzi tərəfindən həyata keçiriləcəkdir.